Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

Xixón 'tips' (II): Nos chigres y de folixa

Votos

(Total de votos recibidos 8)

(Puntuación 3,00)

plaza mayor sidra
Un chigre ye a un asturianu lo qu’un pub a un irlandés. Aprovecha la to visita para mezclate cola xente d'equí en sidreríes, bares de tapes y en restaurantes y sigui estos pasos pa integrate dafechu y nun paecer foriatu:
  • Como te vas decatar, la sidra nun se bebe namás n’ ocasiones especiales. Ye parte de la nuestra vida de tolos díes y bébese a lo llargo de tol añu. Pero tien el so ritual:
  • La sidra pídese por botelles (una botella, una botellina, non ‘una sidra’) y el vasu compártese. Pa potenciar el so sabor, la sidra escánciase.
  • Si nun t’atreves, pidi-y al camareru que te lo eche o pídi-ylo a un/a veceru/a, que seguro que van echate un gabitu, bien enchipaos.
  • Bébese ‘l culín d’un tragu y déxase un poco para tiralo y llimpiar el vasu per onde se bebe.
  • Si dalguién t’echa un culín, nun lu tengas esperando. Garra’l vasu, bébi ‘l culín y devuélvi-ylu pa que puea siguir sirviendo.
  • Comemos muncho. Davezu nos restaurantes déxente la pota enriba la mesa, nun van sirvite un platu. Nun fai falta comer tolo que te ponen. Arriésgueste a que te sirvan más.
  • Nun intentes comer un cachopu ensin compartir. Fabada, cachopu y arroz con lleche y yá yes asturianu.
  • Anque, para ser bon xixonés, hai que tar pendiente de les temporaes. N’iviernu naguamos polos oricios. Y el branu hai que lu estrenar col bonitu y les sardines.
  • El quesu, pa postre.
  • Somos mui arrogantes. Engarrámonos por pagar y ye fácil que t’inviten a un culín cuando saludes a dalguién.
  • En Xixón toos presumen de ser ‘playos’. Que nun t’engañen, los verdaderos son los del barriu de Cimavilla.

De ‘folixa’

  • Si te conviden a una espicha, apúntate ensin dudalo. Ye una fiesta informal onde se come, se canta, se bailla y, sobre too, se bebe sidra. Munches fáense nos propios ‘llagares’.
  • A lo llargo l'añu, tolos barrios, pueblos y parroquies tienen la so ‘fiesta prau’ y a nosotros encántennos. Hai hasta apps pa poder dir ‘de folixa en folixa’. Pon calzáu y ropa cómodo y entaina a baillar los últimos hits ‘folixeros’, acompañaos, claro ta, de sidra. Y, pa forrar, bollos preñaos.
  • Otra celebración tradicional ye l’ amagüestu. Celébrase pela seronda, cuando aconceyamos pa comer castañes asaes y beber sidra ‘del duernu’ (sidra dulce).
  • N’Antroxu antroxamos. Ye dicir, en Carnaval disfrazámonos. Y, cómo non, manducamos: pote asturianu, picadiellu y frixuelos.

La Tierrina

  • Somos mui de la tierra. Siempre vas ver una bandera d’Asturies en cualesquier eventu internacional.
  • Nun nos gusta que se metan cola Tierrina. La Tierrina ye lo nuestro. Namás nosotros podemos metenos con ella. En Xixón pasa lo mesmo col Sporting.
  • Cuando tamos en casa, nun nos llevamos colos d’Uviéu. Fuera d’Asturies, abrazámonos como hermanos.
  • Lloramos al sentir el ‘Asturies Patria Querida’, que, amás de ser l’himno, pieslla cualquier celebración. Los más duros nun puen evitar echar una llagrimina col ‘Asturias’ de Víctor Manuel.