Aceptar
Utilizamos cookies propias y de terceros para mejorar la experiencia de navegación y ofrecer contenidos y servicios de interés.
Al continuar con la navegación, entendemos que se acepta nuestra política de cookies.

El FICX ufre 26 estrenes mundiales

Votos

(Total de votos recibidos 0)

(Puntuación 0)

ficx 55
El certame xixonés va va cuntar cola presencia de prestixosos nomes del cine contemporaneu como Eugène Green, VALIE EXPORT, Paul Vecchiali, Isabel Coixet, Constanza Novick, Lisandro Alonso, John Carroll Lynch, Caroline Deruas y Arnaud Desplechin.
  • La gran presencia femenina nesta edición queda acreitada pol mediu centenar de títulos dirixíos por realizadores, ente ellos la película inaugural, El futuru que vien, de Constanza Novick, y la de pieslle, la coproducción española Naide míranos, de Julia Solomonoff.
  • L'artista Rodrigo Cuevas y la periodista Sonia Ablanéu van presentar la gala d'inauguración nel Teatru Jovellanos, na que se va entregar el Premiu Nacho Martínez a Verónica Forqué y el gallardón d'Honor 2017 al direutor Whit Stillman.
  • Stillman va presidir el Xuráu Internacional que ta formáu pola cineasta Andrea Jaurrieta, la productora Eugenia Mumenthaler, l'actriz Cuca Escribán, y el direutor de programación del Film Society of Lincon Center, Dennis Lim.
  • El Festival estrena troféu nel so 55 edición: per primer vegada'l logo del certame de Xixón va entregase físicamente a los premiaos de 2017, un troféu orixinal impresu en trés dimensiones por 3D Room Made.
El Festival Internacional de Cine de Xixón presenta na 55 edición una programación con 177 títulos, de los que 26 son estrenes mundiales y 4 europeos. Del 17 al 25 de payares, el FICX va encarar l’anovación que vive’l cine español y internacional, ensin escaecer propuestes de grandes maestros. Esti añu, el certame va contar cola presencia de prestixosos nomes de la industria cinematográfica como Eugène Green, VALIE EXPORT, Constanza Novick, Lisandro Alonso, Paul Vecchiali, John Carroll Lynch, Marc Recha, Caroline Deruas, Arnaud Desplechin, Whit Stillman, presidente del Xuráu Internacional al que’l Festival va entregar el Premiu d’Honor 2017, o Isabel Coixet, Premiu Muyer de Cine.

Na 55 edición, el 85% de les películes programaes nes seiciones internacionales, tanto competitives como non, son estrenes n’España. Esta cifra da exemplu del interés que tien el FICX n’ufrir conteníos esclusivos non yá a los cinéfilos de Xixón, y del restu d'Asturies, sinón que con ello pretende captar l'atención de la cinefilia nacional ya internacional.

La gran presencia femenina na 55 queda acreitada pol mediu centenar de títulos dirixíos por realizadores programaos, ente ellos la película inaugural, El futuro que viene, de Constanza Novick, y el pieslle, Nadie nos mira, de Julia Solomonoff, amás de los tres focos dedicaos a l'artista VALIE EXPORT y a les direutores Carla Simón y Elisa Cepedal.

En 2017, el públicu del Festival de Xixón va tener ocasión de dir a más de 80 alcuentros colos y les direutores que presenten les sos películes nel certame, cuasi doblando la cifra de la edición anterior.

L'artista Rodrigo Cuevas y la periodista Sonia Avellaneda van ser los presentadores de la gala d'inauguración de la 55, que se va celebrar nel Teatru Jovellanos (20:30 h). Na mesma van entregase’l Premiu d'Honor a Whit Stillman, y el Premiu de Cinematografía Nacho Martínez a l'actriz Verónica Forqué.

Nesta edición, el FICX vuelve salir de Xixón. Hai Estensiones de la 55 n'Uviéu, Avilés, Cangues d'Onís, Colunga, Llangréu, Siero y Villaviciosa. El públicu va tener la oportunidá de ver catorce películes de la Seición Oficial, Pases Especiales, Rellumes, Enfants, Esbilla y AnimaFICX, amás de la competición de curtios del Día d’Asturies y el programa dedicáu a Elisa Cepedal. Fuera d'Asturies, la programación del FICX va circular peles filmoteques de Cantabria, Valencia y Galicia, y va llegar primero al Centru d'Arte Tabakalera en Donostia.

Seición Oficial: Llargumetraxes

Na Sección Oficial del 55FICX van estrenase n'España 17 llargumetraxes, cinco d'ellos óperes primes, o de realizadores tan respetaos como Paul Vecchiali, Eugène Green, Marc Recha, Ruth Mader, Arnaud Desplechin, Bruno Dumont, Petra Biondina Volpe, Abel Ferrara o Hong Sang-soo.

El futuro que viene (Constanza Novick - Arxentina 2017). Primer llargumetraxe pa la guionista y direutora Constanza Novick pal que contó cola presencia de dos de les actrices más populares d'Arxentina, Dolores Fonzi y Pilar Gamboa, y la producción de Lisandro Alonso. L'amistá de dos muyeres a lo llargo de los años ye analizada nesti filme que va tener la so estrena Europea na inauguración del 55FICX.

Destinos (Posoki, Stephan Komandarev - Bulgaria, Alemaña, Macedonia 2017). Tercer llargumetraxe del direutor búlgaru (unu de los más importantes del so país) Stephan Komandarev. Un filme coral qu'usa, como nexu narrativu, la esperiencia nel día ente día de cinco taxistes de Sofía y que nos trai una visión pesimista sobre la Europa aparentemente bendicha coles ventayes del Estáu del Bienestar que nos tocó vivir. Presentada na seición Un Certain Regard del Festival de Cannes 2017.

Did You Wonder Who Fired the Gun? (Travis Wilkerson - Estaos Xuníos 2017). En 1946, el güelu del cineasta Travis Wilkerson mató a un ciudadanu afroamericano desarmáu nun remotu pueblu d’Alabama. Setenta años más tarde, Wilkerson vuelve al Vieyu Sur pa desvelar esti fechu del so pasáu y revelar el racismu remanente nel corazón d'Estaos Xuníos. El resultáu ye esti documental qu'impautó al públicu de los festivales de Sundance y Locarno.

El orden divino (Die göttliche Ordnung, Petra Biondina Volpe - Suiza 2017). Premiu del Públicu y a la Meyor Actriz nel Festival de Tribeca 2017 pa esta comedia dramática que, amás, va ser la candidata suiza a los Oscars 2018. Una mirada crítica sobre la paternalista democracia helvética que nun dexó'l votu femenín hasta lo último del Sieglu XX. Escelente actuación de la so protagonista Marie Leuenberger.

En attendant les barbares (Eugène Green - Francia 2017). Estrena mundial de la nueva película del veneráu direutor francés Eugène Green. Una película nacida d’una aición formativa pa mozos actores celebrada en Toulouse nel mes de mayu, na que Green vuelve demostrar el so enorme talentu pa la direición d'intérpretes y la so mirada crítica escontra la invasión cultural venida del otru llau del océanu.

Jeannette, l’enfance de Jeanne d’Arc (Bruno Dumont - Francia 2017). Bruno Dumont robla una de les películes más comentaes del pasáu Festival de Cannes. Una ópera-rock sobre l'adolescencia d'una de les figures femenines más almiraes de la Historia Universal. A mediu camín ente'l rellatu desmitificador y l'espiritualidá ascética, la Xuana d'Arcu del cineasta francés ye unu de los biopics más singulares de les últimes décades.

La vida lliure (Marc Recha - España 2017). Marc Recha treslládanos a la islla de Menorca d'entamos del Sieglu XX pa contanos esta historia llena d'almiración pola narración clásica d'aventures y por esplicar la problemática transición de la infancia a la edá madura. Un gran Sergi López, secundáu polos debutantes Mariona Gomila y Macià Arguimbau, protagoniza esti filme trescaláu pol espíritu de Robert Louis Stevenson y William Faulkner que va tener la so estrena mundial nel 55FICX.

Les fantômes d’Ismaël (Arnaud Desplechin - Francia 2017). Arnaud Desplechin inauguró la Seición Oficial del Festival de Cannes con esti filme, deldor de les meyores películes d’Alfred Hitchcock, protagonizáu por Mathieu Amalric, Marion Cotillard, Charlotte Gainsbourg y Louis Garrel. El FICX va ufiertar la oportunidá de ver el metraxe íntegru d'esta cinta, qu'inauguró'l pasáu Festival de Cannes.

Les sept déserteurs ou la guerre en vrac (Paul Vecchiali - Francia 2017). El maestru francés Paul Vecchiali va tener la estrena europea del so nuevu trabayu nel 55FICX. Una farsa sobre la guerra y sobre los que traten d'evitala a la que Vecchiali otorga amás una xuguetona perspeutiva metacinematográfica.

Life Guidance (Ruth Mader - Austria 2017). Nun futuru non mui llonxanu, una sociedá aparentemente perfeuta consigue que tolos sos componentes tean perfectamente optimizaos pal trabayu. Una organización llamada Life Guidance encárgase de devolver a la corrada a les escases oveyes esquiciaes. Ruth Mader vuelve a Xixón, en conquistando al públicu del FICX en 2003, con Struggle.

Lucky (John Carroll Lynch - Estaos Xuníos 2017). Ópera prima del estauxunidense John Carrol Lynch, conocíu pol so llabor como actor en clásicos modernos de la talla de Fargo de los Hermanos Coen o Zodiac de David Fincher. Pal so primer trabayu tres les cámares, Carroll Lynch escoyó como protagonista al gran Harry Dean Stanton, no que supondría pa ésti la so última actuación enantes del so murniu fallecimientu, amás de contar col mesmu David Lynch n'otru de los papeles principales.

On the Beach at Night Alone (Bamui haebyun-eoseo honja, Hong Sang-soo - Corea del Sur 2017). El prolíficu direutor coreanu Hong Sang-soo (retrospectiva FICX’13) va buscar trescalar al públicu de Xixón una vegada más con esta historia sobre una muyer que cavilga sobre la so rellación con un home casáu. Na Berlinale 2017, consiguió l'Osu de Plata a la meyor actriz pal so protagonista Kim Min-hee.

Patty Cake$ (Geremy Jasper - Estaos Xuníos 2017). Patricia Dowbrowsky, una xoven artista que quier ser estrella del rap, va tener que sobreponese al alienante entornu que lu arrodia nuna barriada de Nueva Jersey, Estaos Xuníos. Ópera prima pal debutante Geremy Jasper, foi presentada con gran ésitu de públicu nel Festival de Sundance 2017, optando tamién a la Cámara d'Oru del Festival de Cannes. N'España va ser la única ocasión de ver esta película en pantalla grande, yá que Patty Cake nun va llegar a los cines y va tar namái disponible n'arriendu y venta física y dixital a partir de febreru.

Scary Mother (Sashishi deda, Ana Urushadze - Xeorxa 2017). Ópera prima de la direutora xeorxana Anna Urushadze, prenominada a los Oscar en 2018. Con influencies tan notables como'l Roman Polanski de La Triloxía del Apartamentu o'l mesmu David Lynch, la película cuenta la llucha d'una madre de familia xeorxana pa cumplir el so suañu de convertise n'escritora, arrodiada d'una redolada amenazante y opresora. Premiu a la Meyor Ópera Prima y Premiu del Xuráu Nuevu del Festival de Locarno. Premiu a la Meyor Película del Festival de Sarayevu.

Until the Birds Return (En attendant les hirondelles, Karim Moussaoui - Francia, Arxelia 2017). Karim Moussaoui dirixe esti percorríu pela Arxelia actual, un país nel que siguen abiertes les firíes del so estreldosu pasáu. Tres histories cruciaes que nos ufierten tres realidaes complementaries que van terminar xuniéndose con resultaos dramáticos. Filme de debú pa esti cineasta arxelín del que pudimos ver los sos trabayos como curtiumetraxista en festivales tan destacaos como Clermont-Ferrand o Locarno.

Nadie nos mira (Julia Solomonoff - Arxentina, España, Colombia, Brasil, Estaos Xuníos 2017). El filme dirixíu por Julia Solomonoff va ser la película de pieslle del 55FICX. Una coproducción española centrada nes torgues d'un actor p’abrir pasu na revesosa vida cultural y social de Manhattan. Premiu a la meyor actuación masculina pa Guillermo Pfening nel Tribeca Filme Festival 2017. Fuera de concursu.

Alive in France (Abel Ferrara - Francia 2017). El mitu del underground neoyorquín vuelve a les carreteres, nesti casu franceses, con una serie de conciertos que nos averen al Ferrara más íntimu y personal. Estrenu n'España compartíu cola Filmoteca Española. Fuera de concursu.

Pues baxar el material de les películes y el spot de la Sección Oficial nesti enllaz: http://urls.my/d6JNp6 y http://urls.my/H5VYTT.

Sección Oficial: Curtiumetraxes

Una escoyeta de dieciséis obres audiovisuales tanto nacionales como internacionales componen la Seición Oficial de Curtiumetraxes del 55FICX. Obres que van de la más absoluta vanguardia a la narración más tradicional, percorriendo cuatro continentes, recoyendo los trabayos d'artistes consagraos y de nuevos valores de la cinematografía, usando como elementos narrativos l'aición real y l'animación; un espectacular paséu pelo meyor que nos ufierta esti 2017 en formatu curtiu.

El cine español va tener una importante representación na Competición de Curtiumetraxes, totalizando cinco propuestes sobre los dieciséis que componen la seición. Ente elles, atópense los últimos trabayos de direutores como Pablo Hernando, que con Salió con prisa hacia la montaña, volverá llevanos al so personalísimu Universu, o Luis López Carrasco y el so Aliens, un viaxe de vuelta a los llocos años de la movida madrilana, protagonizada por Tesa Arranz (Zombies). L'asturianu Ramón Lluis Bande va ser el representante de la nuesa comunidá cola so obra Aún me quedan balas para dibujar, una nueva reivindicación de la memoria histórica como ferramienta clave pa entender el nuesu presente, ente que Lluís Quílez va presentar en Xixón el proyeutu que lu llevó a llograr el Premiu MovistarPlus/Pecera Estudio en 2016, 72%. Zarramos los títulos del nuesu país cola capacidá pa la construcción dramática del malagueñu Ramón Salazar y El domingo.

No que fai referencia a los títulos internacionales, el 55FICX va traer a dalgunos de los más premiaos nesta temporada nos más prestixosos festivales. Bon exemplu d'ello ye A Gentle Night, del realizador chinu Qiu Yang, Palma d'Oru del Festival de Cannes nesti 2017, o You Will Be Fine de la cineasta francesa Céline Devaux que llogró'l mesmu gallardón na Seición Orizzonti de la Biennale veneciana. Nomada al Oscar tuvo la primer parte de World of Tomorrow del animador estauxunidense Don Hertzfeldt, qu'agora estrena a nivel nacional en Xixón la continuación d'esti clásicu contemporaneu: World of Tomorrow Episode Two: The Burden of Other People’s Thoughts, la que podría ser la so tercer nominación a la dorada estauína. El ganador del Turner Award, Duncan Campbell, tamién va ser parte integrante de la competición oficial con The Welfare of Tomás Ó Hallisy, un falsu documental sobro dos antropólogos estauxunidenses que visitaron un pueblu de la Irlanda rural na década de los 60.

La direutora portuguesa Salomé Lames, que va presentar el so nuevu trabayu Coup de Grâce, el musical La Bouche del artista colombianu Camilo Restrepo, la provocadora Copa-Loca del prometedor realizador helenu Christos Massalas, el drama social obra d’Adrian Silisteanu Scris/Nescris, los paisaxes simétricos de la letona Laila Pakalnina y la so Hello Horse!, la delicada forma cola que Sofía Quirós Úbeda amuesa la inocencia infantil en Selva y la llucha ente la lluz y la escuridá en Wicked Girl d’Ayce Kartal, piesllen una competición oficial dispuesta a contentar a los más esixentes de la cinefilia xixonesa (y de los visitantes del FICX).

Pues baxar el material de los curtiumetraxes nesti enllaz: http://urls.my/0EXCTd

Xuraos

El realizador estauxunidense nomináu al Oscar Whit Stillman, Premiu d'Honor del 55FICX, va ser l'encargáu de presidir el Xuráu Internacional nesta edición. Stillman ye unu de los mayores referentes de la rama más clásica del cine indie americanu. La so última película Amor y amistad (2016) va proyeutase como Pase Especial nel FICX. El direutor americanu va presidir un xuráu compuestu por otros cuatro espertos del sector, ente los que ta la moza direutora, guionista y actriz Andrea Jaurrieta, quien acaba de terminar el so primer llargumetraxe Ana de día que se va estrenar en 2018.

Al pie d’ellos va tar la productora y antropóloga arxentina Eugenia Mumenthaler quien llogró'l Lleopardu d'Oru nel Festival de Locarno 2011 y el Premiu FIPRESCI cola película Abrir puertas y ventanas (Milagros Mumenthaler, 2011); l'actriz Cuca Escribano, d'ascendencia asturiana, quien a lo llargo de la so carrera trabayó con importantes direutores como Chus Gutiérrez, Gerardo Herrero, Jaime de Armiñán, Azucena Rodríguez, Antonio Banderes o Manuel Gómez Pereira; el Xuráu Internacional cerrar cola incorporación de Dennis Lim, periodista y direutor de programación del Filme Society of Lincon Center, quien va visitar el 55FICX pa presentar el pase especial de la película Carretera Perdida (David Lynch, 1997), en collaboración con Llaboral Cinemateca. Amás, el periodista y críticu estauxunidense va presentar en Xixón el so llibru David Lynch. El hombre de otro lugar. Dennis Lim, Carmen Gray, Laurent Crouzeix y Silvestar Mileta van tar nel FICX gracies al apoyu d’Acción Cultural Española (AC/E) al traviés del so Programa d’Internacionalización de la Cultura Española (PICE) na modalidá de Visitante.

El Xuráu de los Curtiumetraxes a competición va tar formáu por Maialen Beloki, subdireutora del Festival de San Sebastián dende l'añu 2016; Carmen Gray, crítica de cine, periodista y programadora neozelandesa, quien participó como xuráu en más de 40 festivales, incluyendo Berlín, Locarno o L'Habana; y Laurent Crouzeix, programador del Festival Internacional de Curtiumetraxes de Clermont-Ferrand, col que’l FICX apautó una collaboración anguaño, y direutor de proyeutu del Shortfilmdeport.

Enrique Rivero, Paula Arantzazu Ruiz y Hiba Abouk van ser los Xuraos del Cine Español. Rivero llogró un Lleopardu d'Oru nel Festival de Cine de Locarno dirixiendo la so ópera prima Parque vía (2008); pela so parte, Ruiz, periodista especializada en cine, escribe davezu pa Cinemanía, Sensacine, Diari Ara, Levante EMV, ente otros medios. L'actriz española d'ascendencia árabe Hiba Abouk ye conocida poles sos interpretaciones en series de televisión como El Príncipe (2014).

Per tercer añu consecutivu, va faese entrega del Premiu CIMA a la Meyor Película dirixida por una muyer d'ente toles seiciones competitives. El xuráu que va otorgar esti gallardón ta formáu pola direutora y guionista Cristina Andreu, actual vicepresidenta de CIMA (Asociación de Muyeres Cineastes y de Medios Audiovisuales); Eva Lesmes, direutora de cine y televisión, miembru de l'Academia de Cine y socia fundadora de CIMA; y l'actriz, especialista en voz y dicción, Julia Oliva, miembru fundador de l'Academia de les Artes Escéniques d'España y delegada de CIMA n'Andalucía.

El Xuráu FIPRESCI ta compuestu por tres escritores y críticos de la Federación Internacional de Críticos de Cine: la guionista y antropóloga visual rumana Giulia Dobre quien collabora dende va 20 años con dellos festivales internacionales en calidá de direUtora d'arte; Silvestar Mileta, críticu cinematográficu, miembru de la Sociedá Croata de Críticos de Cine foi xuráu de festivales en Tesalónica, Zagreb y Split; y a lo último, Pablo de Vita, collaborador de la revista CineArte y miembru de l'Asociación Española de la Prensa Cinematográfica.

Un troféu en 3D

El FICX estrena troféu nel so 55 edición: per primer vegada'l logo del festival de Xixón va entregase físicamente a los premiaos de 2017.

3D Room Made, perteneciente al grupu De buena tinta, foi la encargada de crear esti troféu orixinal y distintu, tanto nel so diseñu como nel so procesu d'ellaboración. La téunica d'impresión en 3D utilízase anguaño pa la creación de tou tipu de pieces (siempre que'l tamañu de la impresora lo permita), basándose nun complexu conxuntu d'actuaciones previes de desarrollu y parametrización. El material emplegao tien como principal carauterística'l so calter termoplásticu.

Pa la impresión de cada troféu del 55FICX utilizáronse 121 metros de material y emplegáronse 17 hores. El troféu componse de tres pieces, caúna de les cuales foi creada de forma independiente pa depués xuniles de manera manual. Un entrevesgáu y lentu procesu que dio como resultáu un orixinal troféu del que se van imprimir 20 copies. En total, más de 14 díes siguíos d'impresión.
Palabras clave Turismo